inkjarbloggar

18.4.2007 | 23:39

Er ekki rauður dagur á morgun?

Ykkar elskulegur settist niður í kvöld og fitlaði smá stund við fjarstýringuna, ekki að það sé honum neitt sérstakt áhugamál frekar en öðrum karlmönnum. Við "fitlið" komst ykkar ástkær að því að það var nákvæmlega ekkert um að vera áhugavert á sjónvarpsstöðvum sem hann kemst yfir dags daglega. Sum sagt Ruv, n2, skjár 1, sirkus, popppp tíví, sííín, n2 bíó, hmmm eru þær nokuð fleiri hérna á Tálknafirði?? Jæja, semsagt engin bíómynd, hvurgi nokkursstaðar eða neitt annað skemmtilegt. Á 1 Tehehehran auðkýfinganna, Oprahhhooojjj og svo framvegis. Hvar eru bíómyndirnar fyrir áskrifendurna á síðasta degi vetrar. Öðruvísi mér áður brá í sveitinni þegar bara var RÚV. Þá var alltaf góð mynd á síðasta degi vetrar. Og pabbi hallaði sér aftur í gamla stólinn sem hann fékk í afmælisgjöf á fimmtugs afmælinu. Mamma lét jafnvel eftir sér að nöldra minna í honum en dags daglega. Bara af því að það var góð bíómynd og það var síðasti dagur vetrar. Nú borgar maður fleiri þúsund eitthvað og veit að bráðum verður ekkert val, ekkert hægt að streitast við. SKATTURINN sér til þess. Sá góði maður!!!!

Bíó takk fyrir eða eitthvað sem hægt er að horfa á.

Kvart, kvein og nöldur ehf.

Bloggar | Slóð | Facebook | Athugasemdir (0)

20.2.2007 | 09:01

Dulítið um samgöngur vestra.

Samgönguáætlun fyrir næstu 4 ár er komin fram sem og samgönguáætlun til næstu 10 ára. Nokkrar óánægjuraddir hafa heyrst vegna áætlunarinnar og er það í raun að vonum. Hins vegar er ekki hægt að draga dul á það að í áætluninni eru einnig jákvæðir punktar. Mikilvægt er að koma samgöngumálum Bolvíkinga í ásættanlegt horf og undarlegt að sú þyngd sem hefur verið gagnvart þeim málum hafi ekki komið í ljós fyrr en nú, seinni part yfirstandandi kjörtímabils. Eins er fagnaðarefni hvað snertir okkur íbúa á sunnanverðum Vestfjörðum að áætlað sé að verja nálægt 2,3 milljörðum króna í vegabætur milli Svínadals og Flókalundar. Hitt er aftur verra að jarðgöng milli Dýrafjarðar og Arnarfjarðar hafa verið færð til í áhersluröðun þannig að í stað þess að hefja verkið á þessu ári eru allar líkur á að það hefjist í fyrsta lagi árið 2011. Það er nú reyndar ekkert nýtt að bættar samgöngur milli norður og suður hluta Vestfjarða færist aftur á við í áhersluröð þegar nýjar vegaáætlanir eru kynntar. Þetta hefur gerst í hvert einasta skipti sem ný vegaáætlun/samgönguáætlun er kynnt um allangt skeið. Hvernig í ósköpunum stendur á því?? Spyr sá sem ekki botnar neitt í ástæðunum. Það er að vonum að ráðamenn norðan heiða fagni þeim framkvæmdum sem komnar eru á lokastig undirbúnings eða framkvæmdastig í Djúpinu og Arnkötludal. Ég gleðst með þeim. En það er algerlega ólíðandi og óásættanlegt að vegabætur milli Dýrafjarðar og Barðastrandar séu ekki inni í myndinni fyrr en eftir 2011. Hvað jarðgöng milli Dýrafjarðar og Arnarfjarðar segir í vegaáætlun til 2017. “Jafnframt verður, vegna nauðsynlegra samgöngubóta milli norður- og suðurhluta Vestfjarða, unnið að rannsóknum, hönnun og öðrum undirbúningi að Arnarfjarðargöngum árin 2007 og 2008. Göngin verða boðin út þannig að hefja megi framkvæmdir strax að lokinni vinnu við Óshlíðargöng. Varðandi Dynjandisheiði segir svo í vegaáætlun til 2017. “Lagt er til að unnið verði að endurbyggingu vegarins yfir heiðina á þriðja áætlunartímabili og henni lokið.” Varðandi Vestfjarðaveg milli Vatnsfjarðar og Þórisstaða segir í vegaáætlun til 2017.“Lagt er til að unnið verði að framkvæmdum á þessum vegi allt áætlunartímabilið og honum lokið.” Þarna eru bæði frekar jákvæðar staðreyndir og minna jákvæðar.Jákvæði hlutinn er að það á að vinna í veginum um Barðaströnd öll þessi 10 ár og þegar þeim lýkur á að vera komið bundið slitlag á alla leiðina frá Bíldudal til Reykjavíkur. Það er hins vegar ekki fyrr en á seinni hluta þessa 10 ára tímabils sem fara á af einhverjum krafti í að endurbæta vegasamgöngur milli norðan og sunnanverðra Vestfjarða. Það er mjög miður. Hefja þarf strax í sumar vinnu við undirbúning að gerð jarðganga milli Dýrafjarðar og Arnarfjarðar og um leið þarf að fara af fullum krafti í þá vinnu sem fram þarf að fara vegna undirbúnings vegar úr Arnarfirði í Vatnsfjörð á Barðaströnd. Þetta er nauðsynlegt ef ekki á að fara fyrir byggð á sunnanverðum Vestfjörðum líkt og gerðist til að mynda á Hornströndum og í Jökulfjörðum á síðustu öld.

Stjórnmál og samfélag | Slóð | Facebook | Athugasemdir (2)

9.2.2007 | 23:02

Þorrablót í GT

Þorrablót GT var haldið föstudaginn 9. janúar. Blótið var haldið í skólanum og hófst klukkan 11:30. Nokkuð hefðbundið form var á blótinu. Allir bekkir voru með skemmtiatriði sem vöktu mikla lukku, sunginn var þorrabragur eftir Davíð Davíðsson frá Sellátrum, en hefð er á blótum Tálknfirðinga að bragur þessi sé kveðinn við raust. Formið þekkja Tálknfirðingar og aðrir sem hafa setið blót hér en fyrir hina sem minna vita þá er um að ræða kraftmikinn brag um þorramatinn sjálfan og hvernig hans er best neytt. Forsöngvari syngur braginn með drynjanda miklum og blótsgestir taka undir í svipaðri tóntegund eða með eigin nefi. Að sjálfsögðu voru líka sungin hefðbundin þorrablótslög inn á milli þess sem gestir gæddu sér á gómsætinu. Ekki var að sjá annað en allir skemmtu sér og tækju hraustlega til matar síns, nokkrir smökkuðu jafnvel hákarl í fyrsta sinn. Var nokkuð misjafn svipurinn á þeim eftir þá lífsreynslu sem vonlegt er.

Bloggar | Slóð | Facebook | Athugasemdir (0)

9.12.2006 | 22:26

Jólasveinarnir koma??!!

Bloggari lagði land undir dekk á föstudag seinnipartinn, eftir að hafa setið yfir í prófi hjá nemanda í fjarnámi, en auðsótt mál hefur verið hjá þeim "fjölda" fjarnámsnema á framhalds- og háskólastigi sem hér býr að fá að taka próf sína í skólanum, inn í þorp. Ætlunin var að njóta þess atburðar sem merkur þykir á aðventu og er tendrun ljósa á jólatré þorpsins. Í fyrra var ljómandi hátíð þar sem fjöldi bæjarbúa lagði leið sína á Lækjartorg, hvar tréð stendur, til að gleðjast. Jólasveinarnir kíktu við og viðstaddir sungu saman nokkur lög. Ekki var þessu fyrir að fara núna þrátt fyrir að auglýst hafi verið á vef hreppsins að jólasveinarnir myndu kannski láta sjá sig. Ekki bólaði á sveinunum góðu og smáfólkið sem skoppaði glatt um grund varð nokkuð vonsvikið en lét samt á litlu bera. Það er kannski ekki skrítið að sveinarnir hafi ekki látið sjá sig þar eð yfirsveinkan var jú ekki heima til að hafa stjórn á uppákomunni. Heimamenn eru raunar orðnir nokkuð lúnir á fjarveru yfirmanns sveitarfélagsins og ekki bætir "vara" yfirmaðurinn þá fjarveru upp. Hann er jafnvel meira í burtu ef eitthvað er. Ekki það að ég sakni þeirra en það færi nú betur á því að forsvarsmenn sveitarfélagsins væru meira heima hjá sér en raunin er.

Bloggar | Slóð | Facebook | Athugasemdir (0)

1.12.2006 | 16:56

Föstudagur til frama??

Aldrei að vita. Annars hefur verið bölvað vesen á netsambandi í skólanum, en Óðinn er kominn og vonandi horfir þetta til betri vegar. Því verður ekki bloggað meira í dag.

Bloggar | Slóð | Facebook | Athugasemdir (0)

30.11.2006 | 21:08